ರಾಷ್ಟ್ರಕವಿ ಕುವೆಂಪು ಅವರ 'ವಿಶ್ವಮಾನವ ಸಂದೇಶ' ಮತ್ತು ಇಂದಿನ ಸಮಾಜಕ್ಕೆ ಅದರ ಪ್ರಸ್ತುತತೆ

ಇಲ್ಲಿ ವಿಡಿಯೋ ನೋಡಿ:

ರಾಷ್ಟ್ರಕವಿ ಕುವೆಂಪು ಅವರ ಜನ್ಮದಿನವನ್ನು ಕರ್ನಾಟಕ ಸರ್ಕಾರವು 'ವಿಶ್ವಮಾನವ ದಿನ' ಎಂದು ಘೋಷಿಸಿದೆ. ಕುವೆಂಪು ಅವರ ವಿಚಾರಧಾರೆಗಳು ಇಡೀ ಮಾನವಕುಲವನ್ನು ಒಂದಾಗಿ ನೋಡುವ ವಿಶಾಲ ಮನೋಭಾವವನ್ನು ಹೊಂದಿರುವುದರಿಂದ, ಅವರ ಜನ್ಮದಿನದ ಆಚರಣೆಗೆ ಈ ಸಾರ್ಥಕ ಹೆಸರನ್ನು ಇಡಲಾಗಿದೆ.

ವಿಶ್ವಮಾನವ ದಿನದ ಹಿನ್ನೆಲೆ

ಕುವೆಂಪು ಅವರು ಜನಿಸಿದ್ದು ಡಿಸೆಂಬರ್ ೨೯, ೧೯೦೪ರಂದು (ಚಿಕ್ಕಮಗಳೂರು ಜಿಲ್ಲೆಯ ಕೊಪ್ಪ ತಾಲ್ಲೂಕಿನ ಹಿರೇಕೊಡಿಗೆಯಲ್ಲಿ). ಅವರು ತಮ್ಮ ಸಾಹಿತ್ಯದ ಮೂಲಕ ಜಗತ್ತಿಗೆ ನೀಡಿದ 'ಮನುಜಮತ, ವಿಶ್ವಪಥ' ಎಂಬ ಸಂದೇಶ ಅಪಾರವಾದದ್ದು.

ಮನುಷ್ಯ ಜಾತಿ, ಮತ, ವರ್ಣ, ಭಾಷೆ ಮತ್ತು ಪ್ರಾದೇಶಿಕತೆಯ ಸಂಕೋಲೆಗಳಿಂದ ಮುಕ್ತನಾಗಿ ಜಾಗತಿಕ ಪ್ರಜ್ಞೆಯನ್ನು ಬೆಳೆಸಿಕೊಳ್ಳಬೇಕು ಎಂಬುದು ಅವರ ಆಶಯವಾಗಿತ್ತು. ಈ ಉದಾತ್ತ ಚಿಂತನೆಯನ್ನು ಸಮಾಜದಲ್ಲಿ, ವಿಶೇಷವಾಗಿ ಯುವಮನಸ್ಸುಗಳಲ್ಲಿ ಸದಾ ಹಸಿರಾಗಿಡಲು ಕರ್ನಾಟಕ ಸರ್ಕಾರವು ೨೦೧೫ರಲ್ಲಿ ಅವರ ಜನ್ಮದಿನವಾದ ಡಿಸೆಂಬರ್ ೨೯ ಅನ್ನು ಪ್ರತಿವರ್ಷ 'ವಿಶ್ವಮಾನವ ದಿನ'(World Humanist Day / Vishwamanava Diwas) ಎಂದು ಅಧಿಕೃತವಾಗಿ ಆಚರಿಸಲು ಆದೇಶಿಸಿತು. ಈ ದಿನದಂದು ಕುವೆಂಪು ಅವರ ವೈಚಾರಿಕ ಹಾಗೂ ಸಮನ್ವಯ ಚಿಂತನೆಗಳನ್ನು ನೆನೆಯುವ ಕಾರ್ಯಕ್ರಮಗಳನ್ನು ರಾಜ್ಯಾದ್ಯಂತ ಹಮ್ಮಿಕೊಳ್ಳಲಾಗುತ್ತದೆ.

ಯುವ ಪೀಳಿಗೆಗೆ ಕುವೆಂಪು ನೀಡಿದ 'ಪಂಚಮಂತ್ರಗಳು'

ಕುವೆಂಪು ಅವರು ಇಂದಿನ ಸಮಾಜ ಮತ್ತು ಯುವ ಪೀಳಿಗೆಗೆ ಕಿರಿದಾದ ಗಡಿಗಳನ್ನು ದಾಟಿ ದೊಡ್ಡದಾಗಿ ಯೋಚಿಸಲು 'ಪಂಚಮಂತ್ರ' (Five Mantras) ಮತ್ತು 'ಸಪ್ತಸೂತ್ರ'ಗಳನ್ನು ನೀಡಿದ್ದಾರೆ. ಯುವಜನರು ಅಲ್ಪಮಾನವರಾಗದೆ ವಿಶ್ವಮಾನವರಾಗಲು ಪಾಲಿಸಬೇಕಾದ ಆ ಪಂಚಮಂತ್ರಗಳು ಇಲ್ಲಿವೆ:

1. ಮನುಜಮತ, ವಿಶ್ವಪಥ

ಯಾವುದೇ ಒಂದು ನಿರ್ದಿಷ್ಟ ಧರ್ಮ ಅಥವಾ ಜಾತಿಗೆ ಸೀಮಿತವಾಗದೆ, ಇಡೀ ಮಾನವಕುಲವೇ ನಮ್ಮ ಧರ್ಮ ಆದೇ ಮನುಜಮತ. ಮತ್ತು ಇಡೀ ಜಗತ್ತೇ ನಮ್ಮ ದಾರಿ ಅದೇ ವಿಶ್ವಪಥ ಎಂದು ಭಾವಿಸುವುದು. ಸಂಕುಚಿತ ಧಾರ್ಮಿಕ ಚೌಕಟ್ಟುಗಳಿಂದ ಹೊರಬರುವುದು ಇದರ ಮೊದಲ ಆಶಯ.

2. ಸರ್ವೋದಯ, ಸಮನ್ವಯ

ಸಮಾಜದ ಎಲ್ಲಾ ವರ್ಗದ ಜನರ ಏಳಿಗೆಯನ್ನು (ಸರ್ವೋದಯ) ಬಯಸುವುದು ಹಾಗೂ ಭಿನ್ನ ವಿಚಾರಗಳು, ಸಂಸ್ಕೃತಿಗಳು ಮತ್ತು ತತ್ವಗಳ ನಡುವೆ ಸಾಮರಸ್ಯ ಹಾಗೂ ಸಮನ್ವಯತೆಯನ್ನು ಸಾಧಿಸುವುದು. ದ್ವೇಷದ ಬದಲಿಗೆ ಪ್ರೀತಿಯಿಂದ ಎಲ್ಲರನ್ನೂ ಒಳಗೊಳ್ಳುವುದು.

3. ಕ್ರಾಂತಿ, ವಿಕಾಸ

ಬದಲಾವಣೆ ಜಗದ ನಿಯಮ. ಸಮಾಜದಲ್ಲಿರುವ ಹಳಸಿಹೋದ, ಶೋಷಣೆಯುಕ್ತ ಆಚರಣೆಗಳನ್ನು ವಿರೋಧಿಸಿ ವೈಚಾರಿಕ ಕ್ರಾಂತಿ ಮಾಡುವುದು ಹಾಗೂ ಆ ಮೂಲಕ ವ್ಯಕ್ತಿತ್ವ ಮತ್ತು ಸಮಾಜದ ನಿರಂತರ ವಿಕಾಸಕ್ಕೆ (ಬೆಳವಣಿಗೆಗೆ) ಶ್ರಮಿಸುವುದು.

4. ಮುಕ್ತಪ್ರಜ್ಞೆ, ವಿಜ್ಞಾನಬುದ್ಧಿ

ಬುದ್ಧಿ ಮತ್ತು ಆಲೋಚನೆಗಳು ಮುಕ್ತವಾಗಿರಬೇಕು. ಇದೇ ಅನಿಕೇತನ ಪ್ರಜ್ಞೆ. ಯಾವುದನ್ನೂ ಕುರುಡಾಗಿ ನಂಬದೆ, ಎಲ್ಲವನ್ನೂ ಪ್ರಶ್ನಿಸಿ, ವೈಜ್ಞಾನಿಕವಾಗಿ ಮತ್ತು ತಾರ್ಕಿಕವಾಗಿ ವಿಶ್ಲೇಷಿಸುವ 'ವಿಜ್ಞಾನಬುದ್ಧಿ'ಯನ್ನು ಯುವ ಪೀಳಿಗೆ ಬೆಳೆಸಿಕೊಳ್ಳಬೇಕು.

5. ನಿರಂಕುಶಮತಿಗಳಾಗಿ

ಇದು ಕುವೆಂಪು ಅವರು ಯುವಜನತೆಗೆ ನೀಡಿದ ಅತ್ಯಂತ ಪ್ರಸಿದ್ಧ ಕರೆ. "ಓ ಯುವಕರೇ, ನೀವು ನಿರಂಕುಶಮತಿಗಳಾಗಿ" ಎಂದರೆ ಯಾವುದೇ ಸಿದ್ಧಾಂತ, ರಾಜಕೀಯ, ಧರ್ಮ ಅಥವಾ ಸಮಾಜದ ತಪ್ಪು ನಿಯಮಗಳಿಗೆ ನಿಮ್ಮ ಬುದ್ಧಿಯನ್ನು ಅಡವಿಡಬೇಡಿ. ಸ್ವತಂತ್ರವಾಗಿ ಯೋಚಿಸುವ, ಸತ್ಯದ ಪರವಾಗಿ ನಿಲ್ಲುವ ಮುಕ್ತ ಮನಸ್ಸಿನವರಾಗಿ ಎಂದರ್ಥ.

ಯುವಜನತೆಗೆ ಸಂದೇಶ:

ಕುವೆಂಪು ಅವರ ಪ್ರಕಾರ, ಮನುಷ್ಯ ಹುಟ್ಟುತ್ತಲೇ ವಿಶ್ವಮಾನವ. ಆದರೆ ಸಮಾಜ ಅವನಿಗೆ ಜಾತಿ-ಮತಗಳ ಮುದ್ರೆ ಒತ್ತಿ ಅಲ್ಪಮಾನವನನ್ನಾಗಿ ಮಾಡುತ್ತದೆ. ಆ ಮುದ್ರೆಗಳನ್ನು ಅಳಿಸಿ ಹಾಕಿ ಮರಳಿ ವಿಶ್ವಮಾನವನಾಗಲು ಈ ಪಂಚಮಂತ್ರಗಳು ಯುವ ಪೀಳಿಗೆಗೆ ದಿಕ್ಸೂಚಿಯಾಗಿವೆ.